मनै त हो..

झरना, खोला, कन्दराको डोबहरु पछ्याउँछ यो

मनै त हो कैले खुशी कैले चोट बल्झाउँछ यो

बाहिर बादल लाग्दा पनि भित्र शितल मनै त हो

हँसाइदिन्छ, रुवाइदिन्छ के के मात्र गराउँछ यो ।।

एकछिन खाली बस्दैन यो बालख हो, नानी हो यो

मनै त हो कैले ढुङ्गो, कैले तरल पानी हो यो

बैगुनीलाई गुनले मार्ने फराकिलो मनै त हो

माया लाउँछ, मन पराउँछ- राजा हो यो रानी हो यो ।।

कसेर नि कसिदैन, न बाँधेर बाँधिन्छ यो

मनै त हो कैले के मा कैले को मा अल्झिन्छ यो

चरा जस्तै उड्नसक्ने संसार डुल्ने मनै त हो

अँध्यारोमा दिप बनी दसौँ दिशा टल्किन्छ यो ।।

पहाडजस्तो ठुलो बनाउँ, तिमी हाम्रो चित्र हो यो

मनै त हो तिमी हामी, तिम्रो हाम्रो मित्र हो यो

जिन्दगीमा ठेस लाग्दा, आँसु बन्ने मनै त हो               

आँसु पुछ्दै हौस्याइदिने, हामी जम्मै भित्र छ यो ।।

- सुरेश 'समान'