|| चेरी फुल्दा परदेशमा ||

मिर्मिरेमा परेवा 'मकमकघुर' गाँउछन होला

दुध बेच्ने ठुलाबाजे ढोकैनेर आउँछन होला

उस्तै छ कि परीबेश, बद्लिसक्यो मित्र ?

ट्युसन, क्याम्पस, स्कुलतिर ठिटाठिटी धाउँछन होला ।।

यादै होला तिमीलाई पनि नहरमा पौडिएको

२-४ रुपँया भेलापारी फिलिम हेर्न दौडिएको

चल्दैछ कि हाम्रो साइकल, थोत्री सक्यो मित्र ?

भुराभुरी दसैंतिहार नयाँ नाना लाउँछन होला ।।

मिर्मिरेमा परेवा 'मकमकघुर' गाँउछन होला .....

दुध बेच्ने ठुलाबाजे ढोकैनेर आउँछन होला ……

चिचिला ति आँप चोरी सानो छदाँ खान्थे म नि

हिलोमैलो पोखरिमा माछा मार्न जान्थे म नि

अझै छन कि ढालीसके बुढो पिपल मित्र ?

युगल जोडी पिपलफेद प्रेमभाका गाउँछन होला ।।

मिर्मिरेमा परेवा 'मकमकघुर' गाँउछन होला .....

दुध बेच्ने ठुलाबाजे ढोकैनेर आउँछन होला ……..

लगाइ टिका, कुर्तासुरुवाल बार्दलिमा आउनेगर्थिन

आँखा जुध्थे, मुस्कुराँउथे - गीत मिठो गाउनेगर्थिन

याद छ कि बिर्सिनअरे ति दिन उन्ले मित्र ?

पहिले जस्तै दाइने हुँदै चन्द्र-सुर्य छाँउछन होला

मिर्मिरेमा परेवा 'मकमकघुर' गाँउछन होला .....

दुध बेच्ने ठुलाबाजे ढोकैनेर आउँछन होला ……..

कोशी तर्दा मेरो नाममा २-४ सिक्का चढाइदिनु

बाराहीको मन्दिरैमा दुई हात ढोग बढाइदिनु

पुरानै छन ति मन्दिर कि रङ्ग्याइसके मित्र ?

किर्तन, भजन भक्तजनले सुन्न- भज्न पाउँछ्न होला ।।

मिर्मिरेमा परेवा 'मकमकघुर' गाँउछन होला .....

दुध बेच्ने ठुलाबाजे ढोकैनेर आउँछन होला ……..

आमा-बा भेट्न गए सञ्चै छ रे, सुनाइदिनु

आँखा भरी आँसु पार्लान सम्झाइदिनु बुझाइदिनु

दिदी आस गर्दैछिन कि छोडिसकिन मित्र ?

'कैले आउँछ प्यारो भाई' प्रश्न मनमा छाउँछन होला ।।

मिर्मिरेमा परेवा 'मकमकघुर' गाँउछन होला .....

दुध बेच्ने ठुलाबाजे ढोकैनेर आउँछन होला ……..

चेरी फुल्दा परदेशमा, आफ्नो गाउँ सम्झिदै छु

नासपाती र आरु फुल्ने आफ्नो ठाउँ सम्झिदै छु   

कस्तो छ त खेतीबाली, असारपन्द्र मित्र ?

धान, गहुँ, मकै, आलु किसानले लाउँछ्न होला ।।

मिर्मिरेमा परेवा 'मकमकघुर' गाँउछन होला .....

दुध बेच्ने ठुलाबाजे ढोकैनेर आउँछन होला ……..

एस. एन.